राजेंद्र महतो :
खांदु माहातञ पहाड़पुर गाउएक बसइता अना छुटु-मुटु बेजाञ गरिब चासा रहलाक. बेजाञ कसटअ – सेसटअ करिके चास-बास, रिन-धार करिके दिन काटेइ हेलाक. खांदु अकर तिरिआ झेंगलि देविक संगे राइत-दिन खाटि-खाटि जिगिरजिठा हेइके चास करेइ हेला. खांदुक अना बेटा रहलाक. अकर नाम कालिआ माहातअ रहलेइक. कालिआ गांउएक इसकुले पढ़ेइ हेलाक. घारेएक आपाभार खांदुक कांधे रहलेइक. पहाड़पुर साकिम बन भितरे पाहाड़ कचाइ अना पाहाड़ि जुड़िआक धारें बेसअ रहलेइक.
भादर मास टानेक दिन रहलेइक. घारेएक धान-चाउर सिराइ आउएक हेलेइक. खांदु बाड़िक जनाइर गादर नितेइ बेचिके घारेएक खरचा चलाइ हेलाक. दना दिन ले राइत-दिन झड़िआ करेइहेलेइक. बाहार-बाट जाइएक टाउ फुरसत निं देइ हेलेइक. आरअ बेरा डुबले हाथिक डर रहलेइक. दल छाड़ा अना हाथि गांउ-गांउ जदें मन तदें आंध-मुंधिआ घुरेइ हेलाक. बाड़िक आबाद-साबाद के खाइकुन आर गड़े माड़िकुन नास करेइ हेलाक.
आंधरिआ राइत रहलेइक. राइतेक 12 बाजेइ हेलेइक. खांदु घड़र पिटि-पिटि सुतेइ हेलाक.आकचाकाइ घुमेएक भरे झेंगलि के जनाइर बाड़िक बाटेले सुड़-साड़, रट-राट साड़ा सुनि पाउलि. झेंगलि सुति-सुति अनाइ लागलि, अके साड़ा सुनिके लागलेइक, जनाइर बाड़िए जरुर चर डुकिके जनाइर भागेइ साहे. अञ खांदु के उठाइ लागलेइक. खांदु थकि-थुका के मड़ि लेखन सुति गेल रहे. अके ठेलि-ठुला, अलटि-पलटि करि देलेउ निं जागेइ हेलाक. झेंगलिक साड़ा सुनिके अकर बेटा कालिआ उठि गेलाक. दुइअ माञ-बेटा मिलि के ठेलि-ठुला उठाउला आर कहला जनाइर बाड़ि बाटे अनाइ देखा, किना टाक साड़ा आउएहेक. खांदु घार बाड़िए जनाइर लागाइ रहलाक. खांदु साड़ा टाके अनाइके थिराइकुन कहलाक-निंहि, इटा कनअ चरेइक साड़ा नहेएक. जरुर दल छाड़ा हाथि टा आइ थाकताक. कालिआ के कहलाक बाबु टरच बाति टा आने तअ बाबु.कालिआ टरच बाति टि आनि के अकर बाप के देलाक. खांदु घारेएक पाचिरेक भुलकि टाञ टरच मारि के देखलाक अना हाथि आरामे जनाइर के खाइ हेलाक.
खांदु : आउ भुलकि टाञ भालें, कालिआ आर अकर माञ देखला .
झेंगलि : बाबुक बाप, किना उपाइ करबेहे? खेदेएक उपाइ निं करले तअ, सिराइ देतेइक.
कलिआ : भुलकि टा ले काड़-धेनुक लेइके बिंधे न बाप. आपने पाराइ जाताक.
खांदु : निं बेटा, हाथि के कबउ बिंधा-बिंधि निंहि करेएक चाहि. हाथि खेपा ले मसकिल आहेइक.
झेंगलि : काकउ-काकउ उठाउहान न.
खांदु : राइतें केउ निंहि उठता.
झेंगलि : किना उपाइ करबेहें? मके तअ उपाइ हारा लागेहेइक .
खांदु : सबु उपाइ आहेइक. हामरा बड़अ पाहाड़ेएक कराइ बेसल आहिइअ. आर हाथि ठाकुर अकरें छउआ हेकत. तञ टेना टि धुपकाठि आर माचिस टि आने तअ.
बड़अ पाहाड़ आर हाथि ठाकुर के सेउरन करिके देखब .
झेंगलि : तुरुंत माचिस आर धूपकाठि आनि के देलेइक.
खांदु-धुपकाठि जराइके बड़अ पाहाड़, गराम, धरम आर हाथि ठाकुर के एकांतअ मने नेहरे आरसाद करिके कहलाक “मर छुटु छउआ आहे, घारे खाइएक किछु नेखेइक, एहे जनाइर टाञ मर घारेइक धन हेकेइक. इटा के बेरबाद निं करा बाबा. मर छउआ-पुता भअखे मरि जाता. तञ भिनु बाटे जाइकुन आपन ढड़ा भरबे जाञ बाबा”. कहि के घारेएक भुलकि टाञ धुपकाठि जराइके नमअ करलाक.
हाथि ठाकुर धिरे-धिरे जनाइर बाड़ि ले घसकि देलेइक आर सिधा गांउ बाहार चलि गेलाक. कबउ घुरिकेउ पाहाड़पुर बाटे निं देखलाक. एहे लाइ कहा गेल आहेइक “हाथि बुइदगर हेकअत”.